எந்த மாநிலத்தில் யார் யார்? - பகுதி 1

உத்தர பிரதேசம்

எண்பது நாடாளுமன்றத் தொகுதிகளைக் கொண்ட மாநிலம் உத்தர பிரதேசம். பிரதான கட்சிகள் என்று பார்த்தால் மாயாவதியின் பகுஜன் சமாஜ், முலாயம் சிங் யாதவின் சமாஜ்வாதி. வழக்கம்போல காங்கிரஸ் மற்றும் பாரதிய ஜனதா. எல்லா கட்சிகளுமே தனித்துப் போட்டியிடுகின்றன. இந்த மாநிலத்தில் அதிகம் வெற்றிகளைக் குவிக்கும் கட்சி அடுத்த பிரதமரைத் தேர்வு செய்வதில் முக்கியப்பங்கு வகிக்கும். அது, முலாயம் சிங்கா மாயாவதியா என்பதுதான் குழப்பம்.

பிகார்

லாலு பிரசாத், நிதீஷ் குமார் இவர்கள்தான் பிகாரின் தலைமைப் பீடாதிபதிகள். நாற்பது நாடாளுமன்றத் தொகுதிகளைக் கொண்ட பிகாரில் லாலுவின் ராஷ்ட்ரிய ஜனதா தளமும் ராம் விலாஸ் பாஸ்வானும் கூட்டணி அமைத்துப் போட்டியிடுகின்றனர். லாலுவுக்கு 34. பாஸ்வானுக்கு ஆறு. எதிர் அணியில் நிதீஷ் குமாரும் பாரதிய ஜனதாவும் கைகோத்திருக்கின்றன. நிதீஷ் குமாரின் ஐக்கிய ஜனதா தளம் 25 தொகுதிகளிலும் பாரதிய ஜனதா 15 தொகுதிகளிலும் களமிறங்கியுள்ளன. காங்கிரஸ் தனித்து நிற்கிறது.